هذيان
من زمان
وانا احب أكتب على الحيطان
طباشير .. حجارة .. طين
بلاوى مكلكعة فى راسى
كراس شهادات
ورق طراطير
ومدارس الشياطين
بانجو وبنات
صراصير بقى وأوهام
والرقص حنجل بالكلام
من غير لزوم
مأزوم لأنى
ماليش ياعمى
فى السياسة
والحزب لمايكون
شبه الباظراميط
أعمل عبيط
خايف أروح
على إيدين العساكر دول
ورا الكرات
راس فجله متنشى لورا
والمسخرة إنى
مصراوى أنا
واخد ع الفرعنة من سنين
بس مش قادر أدوس
على زناد الجدعنه ،
وسط الهوجة واركب الموجه
واعمل زعيم
خلينى متدارى ورا الكلمات
يا هلترى
أنطق بالجواب
والا السكات
أأمن كتير من تهتهة ومتاهات
ودنيا وكسانة فى زمن وكسات
وانا مين اللى قالى تعالى للدنيا
غير أب جبنه كان مداريه
ورا الستات
وأم فاكره ولادها لولى
ملضومين فى الخيط
واحنا خنافس
متدخششه فى الحيط
واحد اثنين .. بعد الثمانية كام
ملعون أبو اللى ألف كتاب
الحساب والجبر
والحبر أحمر ليه
خطفوه من وشوش إنسان
وسابوه أصفر لمونة
واللمون غالى
إلا لمون الغلابة
معصور فى قلبهم ألم
من غير أمل ولا خير
ماعاتش ياصاحبى اللدود لينا ثمن
إيه العمل يا محسن التفكير
تعالى نعمل مظاهرة
أو اعتصام
تحت السرير
أو فى مكان
يكون أهدا من التحرير
المشتاقين للكرسى
عينهم على الكنب
إنسان أنا
وحقى ضايع فى البلد
وخاذوق كبير
إسمه المواطنة
والمشنقة ف حرية التعبير
http://pulpit.alwatanvoice.com/articles/2011/11/08/242029.html
